ირმა ათაბეგაშვილის პორტფოლიო (II კლასი)

 ახალი წლის სამზადისთან დაკავშირებით მოსწავლეებს წინასწარ მივეცი დავალება წერილობით გადმოეცათ რა ტრადიცია აქვთ მათ ოჯახებში, როგორ ემზადებიან ახალი წლის შესახვედრად. უმზადებენ თუ არა ერთმანეთს საჩუქრებს, მისალოც ბარათებს და ა. შ. შემდეგ კი შევთავაზე, საკუთარი ხელით დაემზადებინათ მისალოცი ბარათები ახლობლებისათვის, მეგობრებისათვის.    მოსწავლეებს ჰქონდათ შესაბამისი რესურსი: წებო, მაკრატელი, ბისერები, ფერადი ქაღალდები, ბამბის დისკები. მათ გამოიყენეს მოცემული რესურსები და შექმნეს ძალიან ლამაზი და საინტერესო ხელოვნების ნიმუშები. სურვილისამებრ მოსწავლეებმა ბარათებში ჩაწერეს საახალწლო მილოცვა.   კლასში მოეწყო ნამუშევრების გამოფენა. შეიქმნა გარემო საგამოფენო დარბაზისა, ავაჟღერეთ შოპენის „წელიწადის დრონი“-დან ნაწყვეტი-„ზამთარი“. ბავშვები და მშობლები ძალიან ნასიამოვნები დარჩნენ.

კლასში ჩატარდა ჯგუფური მუშაობა თემაზე „ნატვრის ხე“. აქტივობის მიზანი იყო ლიტერატურული ტექსტის შედგენა, რომელიც ხელს შეუწყობდა თანამშრომლობის, შემოქმედებითობის, მსჯელობის უნარ-ჩვევის განვითარებას.  მოსწავლეები დავყავი ჯგუფებად. დაურიგდათ სამუშაო მასალა: ფერადი ფანქრები, ფერადი  და თაბახის ფურცლები.   ბავშვებმა მოიფიქრეს და დაწერეს მოთხრობა სათაურის მიხედვით. მოთხრობის თითოეული წინადადება იწყებოდა სათაურში შემავალ თითო ასოზე. მაგ.,პირველი წინადადება უნდა იწყებოდა„ნ“-ზე,მეორე „ა“-ზე და ა. შ. მოთხრობა შედგებოდა იმდენი წინადადებისაგან, რამდენი ასოც არის სათაურში. ჯგუფებმა  გაცვალეს ნაშრომები, საუკეთესოები კი გამოვფინეთ დაფაზე. ბავშვებმა გააკეთეს პრეზენტაცია.